Hugbúnaðarfyrirtækin Vettvangur og Stokkur hafa í sameiningu þróað nýtt og byltingarkennt app í samstarfi við Lyfju sem einfaldar og eykur öryggi við kaup á lyfjum. Appið er það fyrsta sinnar tegundar á Íslandi. Markmið appsins er að auðvelda kaup á lyfjum á sem öruggastan máta.

,,Með appinu geta viðskiptavinir séð hvaða lyfseðla þeir eiga í gáttinni. Þeir geta pantað lyf og sótt pöntun í næsta apótek Lyfju í gegnum flýtiafgreiðslu sem tryggir hraðari afhendingu. Hægt er að fá lyfin send heim samdægurs í stærstu sveitarfélögum landsins. Viðskiptavinir geta séð verð á lyfjum og stöðuna í greiðsluþrepakerfi Sjúkratrygginga Íslands auk að fá ráðgjöf í netspjalli,“ segir Elmar Gunnarsson, einn eigenda og stofnandi Vettvangs, en fyrirtækið hefur sérhæft sig í þróun og rekstri á stafrænum lausnum. Stokkur starfar við hönnun og þróun á öppum.

,,Það var áhugaverð áskorun að þróa þessa lausn, en hún snertir í raun á öllum innviðum Lyfju en fyrirtækið er í þessari stafrænu umbreytingaherferð eins og svo margir viðskiptavinir okkar. Það er mikil breyting að eiga sér stað í viðskiptum og þjónustu og stafrænar lausnir spila lykilhluutverk þar. Vettvangur og Stokkur hafa unnið saman seinustu ár m.a. við þróun lausna fyrir Dominos sem hafa gengið mjög vel og eru raunar orðnar landsfrægar,“ segir Elmar.

Hann bætir við að Lyfja sjái sjálf um heimsendinguna og telur það bestu lausnina því þá hafi fyrirtækið sjálft stjórn á eigin þjónustuupplifun til viðskiptavina. ,,Það er ekki nóg að koma bara flottustu lausnirnar því þarf að fylgja þessu eftir alla leið heim að dyrum viðskiptavina. Heildarupplifunin skiptir raunar öllu máli,“ segir Elmar.

Vettvangur hefur vaxið jafnt og þétt síðustu sjö ár frá stofnun. Alls starfa 15 manns hjá fyrirtækinu; hönnuðir, hugbúnaðarsérfræðingar og viðskiptaráðgjafar. Vettvangur var valið Fyrirtæki ársins hjá VR í flokki lítilla fyrirtækja í árlegri könnun VR sl. vor og var valið Fyrirmyndafyrirtæki ársins hjá VR á síðasta ári.