Prestur í grísku réttrúnaðarkirkjunni hefur verið sakaður um að veita barni áverka við skírn á laugardaginn síðastliðinn.
Greek Reporter greinir frá. Myndband, sem má sjá hér að neðan, sýnir prestinn halda utan um barnið og dýfa því með afli ofan í vatnið. Barnið er hágrátandi á meðan þessu stendur og fætur þess fara nokkrum sinnum utan í málmbrúnina.
Foreldrarnir kvörtuðu undan prestinum. „Presturinn lamdi barnið mitt, við vorum öll að öskra á hann og sögðum honum að fara varlega, en hann svaraði bara: „Ég ber ábyrgð á skírninni,“ sagði móðir barnsins, Ntina Shitta, í Facebook færslu um málið.
„Húð barnsins varð rauð og það var í áfalli! Presturinn eyðilagði fallega daginn okkar,“ sagði hún.
Í sjónvarpsviðtali á sunnudaginn baðst presturinn afsökunar en neitaði að hafa meitt barnið viljandi.
„Sannleikurinn er sá að á einum tímapunkti var ég næstum því búinn að missa barnið, það var svo sleipt, þið sjáið það á myndbandinu að ég set höndina undir mjöðm barnsins til að vernda það. Ég ætlaði ekki að meiða barnið,“ segir hann.
„Ég hef skírt mörg börn. Þegar ég áttaði mig á að barninu leið illa þá reyndi ég að klára athöfnina eins fljótlega og ég gat.“