Afreksíþróttakonan Karen Axelsdóttir varð fyrir hræðilegri reynslu fyrir sex árum er hún hálsbrotnaði í hjólreiðaslysi. Eftir fjögurra ára baráttu við að endurheimta heilsu sína ákvað hún að taka líf sitt föstum tökum.

Um þetta er fjallað á vef RÚV en í kvöld kl. 22:20 sýnir Sjónvarpið viðtal Sigmars Guðmundssonar við Karen, í þættinum Okkar á milli.

Í þættinum kemur meðal annars fram að ekki aðeins tókst Karen að endurheimta heilsu sína svo vel að hún gat farið að keppa á ný í hjólreiðum heldur hefur hún hvað eftir annað komist á verðlaunapall.

Í nýrri Facebook-færslu um þáttinn og Karen skrifar Sigmar:

Karen Axelsdóttir er magnaður karakter. Afrekskona í iþróttum sem hálsbrotnaði í hjólreiðum fyrir fáeinum árum. Hún var heppin að lamast ekki en gat varla haldið haus í orðins fyllstu merkingu í fjögur ár og þurfti mikla aðstoð í daglegu lífi. Flestir hefðu afskrifað frekari íþróttaþáttöku eftir þessi ósköp, en Karen er ekki þeirrar gerðar. Með því að tileinka sér hugarfar afreksíþróttamannsins í bataferlinu náði hún ótrúlegum árangri. Síðasta sumar vann hún allar helstu hjólreiðakeppnir landsins og varð meðal annars bikarmeistari í götuhjólreiðum, bikarmeistari í fjallahjólreiðum, íslandsmeistari í maraþonhjólreiðum og sigurvegari í Blálónsþrautinni. Að hlusta á hana lýsa þessu ferli er bæði innspírerandi og fallegt. Karen er fyrsti gestur minn í nýjum viðtalsþætti sem verður framvegis á dagskrá eftir fréttir klukkan tíu á RÚV.