Jóhannes Kr. Kristjánsson er líklega þekktasti rannsóknarblaðamaður Íslands. Eftir margra mánaða vinnu varð umfjöllun hans um Panamaskjölin til þess að tugþúsundir mótmæltu og Sigmundur Davíð þurfti að hætta sem forsætisráðherra. Í viðtali við Sölva Tryggvason í Podcasti Sölva ræða þeir meðal annars um tímabilið eftir að dóttir Jóhannesar lést, en Sölvi var einn sá fyrsti sem Jóhannes hringdi í eftir atburðinn
„Þú hringdir í mig þegar þér leið illa og ég hringdi í þig þegar mér leið illa,“ segir Jóhannes, sem segir að tímabilið á eftir hafi verið hræðilegt og oft viti fólkið í kring ekki hvernig það eigi að vera:
„Mér fannst erfitt að sjá fólk sem þorði ekki að nálgast mig og taka utan um mig af því að það vissi ekki hvað það ætti að segja.“
Jóhannes hefur upplifað margt og missti einnig föður sinn þegar hann var ungur. Hann áttaði sig nýlega á því í gegnum vinnu með geðlækni að hann hafi gengið í gegnum erfiða áfallastreitu.
„Hann veiktist snögglega og ég var nýbúinn að læra prósentureikning og ég man að ég var alltaf að spyrja mömmu hvað það væru mörg prósent líkur á að hann myndi lifa þetta af. Fyrst voru það töluverðar líkur, en svo var það komið niður í eitt prósent, en ég hélt alltaf í vonina,“ segir Jóhannes og segist hafa farið í gegnum mjög erfitt tímabil á eftir þar sem hann fór í afbrot og alls kyns vitleysu, þangað til hann komst á heimavistarskóla.
Í viðtalinu ræða Sölvi og Jóhannes einnig um viðtalið fræga við Sigmund Davíð, nýjasta verkefni Jóhannesar og margt fleira
Viðtal Sölva við Jóhannes má sjá hér:
https://www.youtube.com/watch?v=x8uAsnZYJnA