Breski kvikmyndagagnrýnandinn Mark Kermode, sem af mörgum er talinn einn sá virtasti í bransanum, segir tónlist Hildar Guðnadóttur úr myndinni Joker vera það allra besta sem tilheyrði kvikmynd á árinu liðnu.
Í laufléttu spjalli við Scala Radio segir Kermode dómnefnd bandarísku kvikmyndaakademíunnar vera langt á eftir sinni samtíð og telur það vera sorglegt hversu fáar konur eru tilnefndar til Óskars, bæði í ár og gegnum sögu verðlaunanna. Hann segir hugsunarhátt akademíunnar vera að breytast til hins betra en hefur þróunin verið fullhæg. Hann telur það vera afar niðurdrepandi að aðeins ein kona hafi fengið tilnefningu í flokki frumsaminnar tónlistar þetta árið. Hann er engu að síður ánægður með tilnefningu Hildar og er vongóður um sigurlíkur hennar.
„Ég held að flestir sem veðja á Óskarinn eru sammála því að Hildur Guðnadóttir sé stærsta uppáhaldið á komandi verðlaunahátíð fyrir tónlistina í Joker, sem er alveg stórkostleg. Þetta er mín allra uppáhalds kvikmyndatónlist frá síðasta ári,“ segir Kermode.
„Mér finnst þessi tónlist eiga skilið að vinna verðlaunin og ég tel afar líklegt að hún muni gera það.“
Viðtalið má sjá í heild sinni að neðan.
WATCH @kermodemovie bigging-up @hildurness to win Best Original Score at this year’s #Oscars inc. a handy guide about women composers at the Academy Awards over the decades. Listen to the whole show here. >> https://t.co/1h43Dhn9cz pic.twitter.com/vpgFs1WUwO
— Scala Radio (@ScalaRadio) January 22, 2020