„Ég var tíu ára þegar ég mætti í fyrsta sinn með mynd af Beckham í klippingu, en ég hef klippt mig á hársnyrtistofunni Wink í Kópavogi nánast alla tíð. Hún var einmitt í sama húsi og United-klúbburinn á Íslandi á þessum tíma,“ segir handboltahetjan Björgvin Páll Gústavsson. Hann hefur notað knattspyrnugoðið David Beckham sem tískufyrirmynd þegar kemur að hárgreiðslum í fjölmörg ár og birtir í „story“ á Instagram þakklætisvott til Beckham fyrir innblásturinn.
„Ég byrjaði ungur að halda með Manchester United og þá var jú Beckham allt í öllu, bæði innan vallar sem utan. Mér fannst hann geggjuð týpa og ég held að ég hafi ekki verið einn um það,“ segir Björgvin Páll um þessa ást á Beckham.
Þegar að flett er í gegnum myndirnar af hárgreiðslu Björgvins annars vegar og Beckhams hins vegar kemur einnig í ljós að Björgvin virðist hafa sótt meira en bara hárinnblástur til goðsins, heldur einnig innblástur er varðar skeggvöxt og fataval. Er það meðvitað eða ómeðvitað?
„Nei, þar er í raun tilviljun. Mig grunar reyndar að hann hafi elt mig þegar kemur að fatavali og fleiru,“ segir Björgvin Páll og hlær.
Björgvin Páll tók sér pásu frá sínu helsta átrúnaðargoði í hári þegar Beckham klippti af sér síða hárið fyrir nokkru síðan, en eins og landsmenn vita hefur hár Björgvins Páls lengi verið í síðari kantinum. Handboltahetjan ákvað hins vegar í vikunni að endurnýja kynnin við ljúfa lokka Beckhams.
„Þegar ég ákvað að klippa mig núna um daginn þá vissi ég ekkert hvernig ég vildi klippa mig og fannst þá bara mjög sniðugt að mæta aftur með mynd af Beckham, 23 árum eftir að ég mætti með fyrstu myndina. Ég held að hann hafi aldrei verið flottari,“ segir Björgvin Páll. Ástæðan fyrir klippingunni er þó djúpstæðari en einungis að skarta nýrri hárgreiðslu.
„Ástæða þess að ég klippti mig var minna af útlitsástæðum en meira fyrir mig til þess að loka erfiðum kafla í lífinu og byrja nýjan. Ég er búinn að vera díla við alls konar drasl upp á síðkastið, en er núna kominn á geggjaðan stað,“ segir Björgvin Páll.
https://www.instagram.com/p/B2epVT3g-xQ/
