Ísland hefur verið vinsæll viðkomustaður heimsfrægra kvikmyndagerðarmanna. Í tilefni frétta að sjálfur George Clooney sé væntanlegur í tökur á Íslandi ákváðum við að rifja upp fimm staði sem Hollywood hefur gert heimsfræga.
Kirkjufell við Grundarfjörð spilaði stóra rullu í sjónvarpsþáttunum Game of Thrones og var talað um það sem fjallið sem líktist örvaroddi. Fjallið varð í kjölfarið eitt frægasta fjall landsins og leggja margir leið sína á Snæfellsnes til þess eins að berja það augum.
Annar staður sem varð gríðarvinsæll eftir að Game of Thrones fór í sýningar, nánar til tekið fimmti þáttur í þriðju þáttaröð, var Grjótagjá við Mývatn. Aðalsöguhetjan Jon Snow naut þar ásta með Yrgitte en í fyrra komst hellirinn í fréttir vegna slæmrar umgengni gesta.
Eitt fallegasta atriðið í kvikmyndinni The Secret Life of Walter Mitty, sem var að stórum hluta tekin upp á Íslandi, var þegar að Walter Mitty, leikinn af Ben Stiller, renndi sér á langbretti niður Seyðisfjarðarveg á Austurlandi.
Önnur perla á Austurlandi er Reyðarfjörður en það var breska spennuþáttaröðin Fortitude sem kom bænum á kortið. Fortitude var tekin upp bæði á Reyðarfirði og á Bretlandi og náði að endurspegla þá drungalegu náttúrufegurð sem er að finna víðs vegar um Ísland.
Skærasta stjarnan er þó óumdeilanlega Svínafellsjökull í vestanverðum Vatnajökli sem hefur veitt mörgum listamanninum innblástur. Meðal kvikmynda sem hafa verið teknar þar upp eru Batman Begins og Interstellar, en einnig mátti sjá jöklinum bregða fyrir í Game of Thrones.
