Söngkonan Selma Björnsdóttir er í Tel Aviv í tilefni Eurovision-keppninnar, en Selma tróð upp á Euro Club, opinberum skemmtistað Eurovision-keppninnar, um helgina.
Henni til halds og trausts var nýi kærasti hennar, Kolbeinn Tumi Daðason. Kolbeinn er fréttastjóri Vísis og er einnig í Ísrael vegna vinnunnar, þar sem hann skrifar pistla á visir.is.
Selma og Kolbeinn hafa verið að stinga saman nefjum um nokkurt skeið, eins og DV hefur áður sagt frá. Hamingjan geislar af þeim í Tel Aviv og fylgdist Kolbeinn vel með undirbúningi Selmu áður en hún steig á svið í Euro Club. Má segja að Selma hafi fengið stjörnumeðferð, enda mikil stjarna, jafnt innan Eurovision-samfélagsins og utan, og var stjanað við hana á hótelinu í Tel Aviv.