Storytel efnir í fyrsta sinn til handritasamkeppni fyrir hljóðbækur.

Óskað er eftir tilbúnum handritum að skáldsögu á íslensku sem skal vera samfelldur texti sem tekur um 6 – 9 klukkustundir í lestri, eða 50.000 – 90.000 orð.

Valin verða allt að þrjú handrit úr innsendum verkum sem gefin verða út sem hljóðbækur hjá Storytel. Útvöldum höfundum býðst útgáfusamningur vegna hljóðbókar en höfundur heldur öðrum réttindum svo sem vegna raf- eða prentaðrar bókar. Storytel sér um framleiðslu, markaðssetningu og greiðir fyrirframgreiðslu vegna verksins.

1. sæti – 300.000 kr
2. sæti – 200.000 kr
3. sæti – 100.000 kr

Höfundagjöld eru greidd skv. útgáfusamningi milli Félags íslenskra bókaútgefenda og Rithöfundasambands Íslands. Fyllsta trúnaðar verður gætt vegna innsendra handrita en skýrt verður frá vinningshöfum opinberlega.

Dómnefnd er skipuð Sigrúnu Margréti Guðmundsdóttur, bókmenntafræðingi og formanni dómnefndar, Óskari Guðmundssyni rithöfundi og Sólu Þorsteinsdóttur framleiðanda hjá Storytel.

Handritin, ásamt stuttri kynningu á höfundi skulu send fyrir 9. maí 2019 á netfangið handrit@storytel.com, merkt „Eyrað 2019“.