Rapparinn Herra Hnetusmjör er kominn með sinn eigin sjónvarpsþátt sem sýndur verður í Sjónvarpi Símans í lok apríl. Um er að ræða sex þætti og ganga þeir undir nafninu Kling Kling.
„Þetta er búið að vera í vinnslu í þónokkurn tíma,“ segir Herrann í samtali við DV. „Þetta eru lífsstílsþættir af bestu gerð og ég fæ með mér þjóðþekkta einstaklinga og vini til að prófa með mér alls konar rugl.“
Eins og sést á kynningarplakati fyrir þættina eru ýmsar manneskjur á því í teiknimyndaformi, til dæmis tónlistarmaðurinn Friðrik Dór og plötusnúðurinn Dóra Júlía.
En hve ruglaðir verða þættirnir?
„Þetta verður ekkert 18 plús,“ segir Herra Hnetusmjör og hlær. „En það verður skemmtilegt að horfa á þetta. Það er mikið þarna sem meðalmaðurinn er ekki að fara að upplifa,“ segir rapparinn, sem er einmitt landsþekktur fyrir að vera hrokafullur og góður með sig. Fær sem sagt hrokafulla hliðin þín að skína í þessum þáttum?
„Ó, já.“
