Handknattleikskappinn Björgvin Páll Gústavsson opnar sig upp á gátt í nýútkominni bók, Án filters. Hér eru fimm hlutir sem þú vissir hugsanlega ekki um þennan fálkaorðuhafa og þjóðarhetju.
Björgvin Páll byrjaði að búa sextán ára gamall og bjó í viðbyggingu við HK-heimilið, félagið þar sem handboltadraumurinn byrjaði að taka á sig mynd hjá markmanninum knáa. „Fyrsta íbúðin mín er í rauninni íbúð sem er tengd við HK-heimilið. Þegar ég var ekki heima hjá mér í þessari íbúð þá var ég inni í sal að leika mér með bolta, taka markmannsæfingu eða lyfta. Ég bjó þar í rauninni hvort sem ég var „heima“ hjá mér að horfa á sjónvarpið eða á æfingu,“ sagði Björgvin Páll í viðtali við Mónitor.
Í sama viðtali við Mónítor sagðist Björgvin Páll hafa fallið fyrir eiginkonu sinni, Karen Einarsdóttur, eftir að hann sá fermingarmynd af henni uppi á vegg hjá félaga sínum, Jóhanni Gunnari Einarssyni, bróður Karenar. „Ég sagði svona: „Er þetta systir þín uppi á vegg, Jói? Gefðu mér númerið hennar.“ Þetta byrjaði þá bara sem grín gagnvart honum að ég fór að senda henni SMS. Síðan vatt þessi fíflaskapur upp á sig og við héldum einhverju sambandi í gegnum SMS-skilaboð þangað til hún mætti á leik hjá okkur og þá sá ég hana uppi í stúku og varð eiginlega bara heillaður strax.“
Í viðtali við DV árið 2010 sagðist Björgvin Páll hafa verið vandræðagemlingur í æsku, sem endaði á því að hann var vistaður á Barna- og unglingageðdeild Landspítalans um stutta hríð. „Þegar ég kom þarna inn má segja að ég hafi ekki verið jafnbrjálaður eða virkur og menn héldu fyrst. Ég var nú bara þarna í körfubolta og að hugsa málin í rauninni. Ég sé ekkert eftir því að hafa farið þarna inn.“
„Ég er mjög trúaður og barnatrúin sem amma mín lagði áherslu á þegar ég var yngri hefur vaxið með mér. Ég fer með stutta bæn á marklínunni rétt áður en leikurinn hefst og ég hef trú á því að ég og liðið fáum hjálp frá æðri máttarvöldum,“ sagði markmaðurinn í viðtali við 24 stundir árið 2008.
Björgvin Páll er á ketómataræðinu til að bæta samband sitt við mat. Hann finnur mikinn mun á sér á mataræðinu, eins og hann sagði frá í viðtali við DV fyrr á þessu ári. „Þessi blessaða ketóflensa er eitthvað sem ætti í raun að heita kolvetnaflensa, þar sem einkennin tengjast því að við erum orðin svo kolvetnaháð. Ég var á þannig stað andlega og líkamlega að einhver smá höfuðverkur eða slappleiki var ekkert til að tala um og ég fór að finna fyrir kostum þess að vera á ketó frekar fljótt.“
