Undanfarið hafa staðið yfir miklar breytingar á strætóskýlum borgarinnar. Strætóskýlin eru hægt og rólega að uppfærast en nú eru komin upp skýli með tölvuskjáum.
Áður en þessir skjáir komu til sögunnar voru baklýst auglýsingaplaköt í strætóskýlunum. Þá þurfti að skipta um plaköt við og við og krafðist það einhvers mannafla. Með þessum nýju skjám er þó hægt að skipta um auglýsingar án þess að þurfa að opna skýlin enda eru skjáirnir tengdir við tölvu.
Það að strætóskýlin séu orðin tæknivædd þýðir þó ekki að klúður séu úr sögunni. Athugull borgari tók í dag mynd af einu af nýju strætóskýlunum en þar mátti sjá heldur óvenjulega sjón.
Eins og sjá má á myndinni hér fyrir ofan er engin auglýsing á skjánum heldur einungis skjáborð. Svo virðist sem eitthvað hafi farið úrskeiðis í þessu strætóskýli en hver veit? Kannski er bara verið að prufa nýjar aðferðir við að auglýsa tölvuruslatunnur og hugbúnaðarlausnir.
