Magnús Carlsen, sterkasti skákmaður heims um árabil, á von á barni með eiginkonu sinni Ellu Victoriu Malone. Parið gekk í það heilaga við hátíðlega athöfn í Osló í byrjun janúar á þessu ári og beið ekki boðana með að fjölga mannkyninu.

Ella, sem er 26 ára gömul, hefur undanfarna mánuði verið áberandi gestur á skákmótum sem Magnus tekur þátt í og stutt hann með ráðum og dáð. Þá er hún farin að leika stórt hlutverk varðandi ýmis markaðsmál og auglýsingasamninga tengdum Carlsen. Parið fór fyrst að sjást opinberlega í febrúar árið 2024 en Ella er sannkallaður heimsborgari, móðir hennar er norsk en faðir hennar bandarískur og hún hefur búið víða um heim. Til að mynda var hún með lögheimili í Singapore þegar hún og skákmeistarinn fóru að stinga saman nefjum.

Magnus, sem er 34 ára gamall, hefur verið sterkasti skákmaður heims í rúm 15 ár og unnið allt sem hægt er að vinna í íþróttinni. Hann varð heimsmeistari í skák árið 2013 og hélt titlinum í áratug þar til að hann lýsti því yfir að hann hefði ekki lengur áhuga á hinum löngu einvígjum sem einkenna baráttuna um heimsmeistaratignina og ætlaði að einbeita sér að skákmótum með styttri tímamörkum. Þar hefur hann haft ótrúlega yfirburði síðan og það sama gildir þegar hann teflir í hefðbundnum kappskáksmótum.

Magnus greindi sjálfur frá tíðindunum um erfingjann á Facebook-síðu sinni og var og greinilega að rifna úr stolti.