Orri Páll Ormarsson, blaðamaður Morgunblaðsins, skýtur föstum skotum á þátt Gísla Marteins í Morgunblaðinu í dag. Hann gagnrýnir Gísla fyrir val sitt á viðmælendum fyrir þáttinn Vikan með Gísla Marteini. Orri Páll segist skrifa til Gísla í góðum og uppbyggilegum tilgangi.

„Þú ert frábær sjónvarpsmaður og aufúsugestur í stofunni á sveitasetri mínu á föstudagskvöldum en gestavalið í þættinum þarf að fara að hressast, eins og Eyjólfur forðum. Horfði maður bara á Vikuna myndi maður draga þá ályktun að í þessu landi byggju aðeins þrjár stéttir manna; uppistandarar, leikarar og stjórnmálamenn. hvernig væri að brjóta samkvæmið einu sinni og bjóða til þín bónda, starfsmanni Reiknistofu bankanna og kökuskreytingarmanni,“ spyr Orri Páll.

„Nú hef ég ekkert á móti þessum þremur stéttum sem þú hefur svona mikið dálæti á, það er upp til hópa hávandað fólk, en vandamálið er að það er yfirleitt bara komið í einum tilgangi til þín – til að plögga. Hvort sem það er sýning, viðburður, kvikmynd eða pólitísk stefna. Og plögg er alveg ofboðslega vont sjónvarpsefni á föstudagskvöldi.“

Orri Páll segir þó val hans á viðmælendum ekki hafa verið alslæmt í gegnum tíðina.

„Inn á milli slæðast plöggleysingjar og dæmi um frábæran gest sem þú hefur fengið til þín er Árni Helgason, lögmaður og ekki bindindisfrömuður. Hann hefur skýra og kóíska sýn á málefni líðandi stundar og þarf ekki að plögga nokkrum sköpuðum hlut. Þannig gesti máttu gjarnan leiða oftar til öndvegis. Árnaðu þig upp, lagsi!“