Leikarinn Jóhannes Haukur Jóhannesson hefur í mörgu að snúast þessa dagana en hann hefur verið ráðinn í hlutverk í vísindaskáldsögutryllinum Infinite ásamt stórleikaranum Mark Wahlberg. Fréttaveitan Deadline greinir meðal annars frá þessu.
Infinite er byggð á skáldsögunni The Reincarnationist Papers eftir D. Eric Mainkranz og segir myndin frá manni sem er ásóttur af eigin fortíð sem hann á erfitt með að muna til fulls. Dag einn uppgötvar hann margra alda gamalt samfélag sem enn stendur og vill Evan ólmur verða hluti af því. Í umræddu samfélagi hafa meðlimir þess aðgang að minningum fyrri lífa og mun aðkoma Evans hafa ófyrirsjáanlegar afleiðingar á framvindu mála.
Hermt er að Wahlberg fari með burðarhlutverkið í myndinni og í leikhópnum má einnig gera ráð fyrir þeim Sophie Cookson, Kae Alexander og Dylan O’Brien, sem margir þekkja eflaust úr The Maze Runner myndabálknum og sjónvarpsseríunni Teen Wolf.
Infinite er leikstýrt af hinum þaulreynda Antoine Fuqua, sem er þekktastur fyrir myndirnar Training Day, Olympus Has Fallen, Southpaw og The Equalizer ásamt framhaldi hennar.
Þess má geta að Jóhannes mun einnig bregða fyrir á næsta ári í yfirnáttúrulegu ofurhetjumyndinni Bloodhot, en þar leikur hann skúrk sem berst við engan annan en Vin Diesel. Þá er leikarinn einnig væntanlegur í kvikmyndinni The Good Liar, með þeim Ian McKellen og Helen Mirren.
Infinite er væntanleg í kvikmyndahús um haustið á næsta ári.