Miss Universe Iceland fór fram síðastliðið laugardagskvöld í Hljómahöll í Reykjanesbæ og var Birta Abiba Þórhallsdóttir kjörin Miss Universe Iceland.

Vísir sýndi keppnina í beinni og birti síðan myndband af hverju atriði á vefnum.

Keppnin skiptist í nokkra hluta. Fyrst var upphafsatriði þar sem stúlkurnar dönsuðu og kynntu sig. Síðan komu keppendur fram á sundfötum. Næst á eftir því komu þær fram í síðkjólum.

Á eftir því voru efstu þrettán keppendur valdir og þeir þurftu að kynna sig á ensku fyrir dómnefndina og höfðu til þess 30 sekúndur. Síðan þurftu tíu efstu keppendurnir að sitja fyrir svörum dómaranna. Og að lokum voru veitt verðlaun.

Vísir er með klippur af öllum þessum atriði á vefnum sínum. Flestar klippurnar eru með frekar svipuð áhorf. Verðlaunaafhendingin er með um 6700 áhorf, „Topp tíu sitja fyrir svörum“ er með rúmlega 15 þúsund áhorf og viðtalið við Birtu eftir sigurinn er með um 15 þúsund áhorf.  En athygli vekur að ein klippan er með lang flestu áhorfin sem telja samtals 67 þúsund.

Vinsælasta myndbandið er af sundfataatriðinu. Keppendur voru allir í svörtu bikiní og með skikkju sem leit út eins og fiðrildavængir. Þú getur séð atriðið hér.

Það vakti athygli árið 2017 þegar Birgitta Líf, framkvæmdarstjóri Ungfrú Íslands, greindi frá því að keppendur myndu ekki koma fram á sundfötum það árið. Í staðinn var íþróttasýning frá Nike.

Hún sagði í samtali við Vísi á þeim tíma að „[við] höfum tekið út bikiníatriðið, þar sem engin sundfatasýning er í Miss World og fannst okkur sá þáttur orðinn barn síns tíma.“

Árið 2014 var ákveðið að sundfataatriðið yrði ekki lengur hluti af Miss World, en það hafði verið það síðan upphafi keppninnar árið 1951.

„Ég þarf ekki að sjá konur ganga fram og til baka í bikiníi. Það gerir ekkert fyrir konuna. Og það gerir ekkert fyrir ekkert okkar,“ sagði Julia Morley, fundarstýra Miss World, við Telegraph 2014.

Ungfrú Ísland og Miss Universe Iceland eru þær tvær fegurðarkeppnir sem hafa verið haldnar hér á landi síðustu árin. Sú sem er kjörin Ungfrú Ísland keppir í Miss World, eða Ungfrú heimur. Birta Abiba, Miss Universe Iceland, mun vera fulltrúi Íslands í Miss Universe.

Arna Ýr Jónsdóttir hefur til að mynda verið krýnd bæði Ungfrú Ísland og Miss Universe Iceland. Hún var kjörin Ungfrú Ísland árið 2015 og Miss Universe Iceland árið 2017.

Þá er spurningunni varpað til ykkar kæru lesendur, er sundfataatriði fegurðarsamkeppna barn síns tíma, eða sýnir áhugi netverja annað? Hvað finnst ykkur?