Vala vinnur nú að sinni fyrstu sólóplötu ásamt Stefáni Erni Gunnlaugssyni en Vala lauk nýverið fjármögnun á plötunni í gegnum Karolinafund. Þann 8 maí síðastliðinn kom út lagið Hrísey en um er að ræða smáskífu af væntanlegri plötu Völu.
„Mig hefur langað að gefa út plötu með eigin lögum síðan ég var tvítug og byrjaði í söngnámi. En ég fór rosalega langa krókaleið til að komast á leiðarenda og láta drauminn raunverulega rætast. Ég lærði klassískan söng í mörg ár áður en ég leyfði mér að fatta að það var alls ekki það sem ég hafði ætlað mér. Svo fór ég í tónsmíðanám í Listaháskólanum þar sem ég lærði líka klassískar tónsmíðar, og það var ekki fyrr en ca. 2 árum eftir að ég útskrifaðist að ég endurnýjaði tengslin við þennan gamla draum, og fór að vinna í því að láta hann rætast. Þetta var frekar merkileg upplifun því ég hafði einhvern vegin alla ævi ýtt henni lengst niður. Ég í rauninni trúði því ekki að ég gæti þetta. Mér fannst ég ekki nógu merkileg til að gefa út eigin plötu. En svo stóð ég á einhvers konar krossgötum þarna. Var búin að skoða allskonar hugmyndir um hvernig ég gæti unnið við tónlist, m.a. búin að vera að syngja í útfararkórum. En þegar ég áttaði mig á því að ég fann mig ekki almennilega í því, og hætti, þá flaut þessi gamli draumur upp á yfirborðið. Og ég fann bara svo sterkt innra með mér að þetta var eitthvað sem ég varð bara að láta gerast. Það var ekki valkostur fyrir mig lengur. Og þá var einhvern vegin ekkert sem gat stoppað mig. Efinn, óttinn og minnimáttarkenndin bliknaði í samanburði við þennan gífurlega kraft sem fylgdi sannfæringunni um að ég yrði að gera þetta.“
DV tónlist hefst á slaginu 13.00 á vef DV.is.
