„Skrifaði undir útgáfusamning við Forlagið í dag. Skáldsaga í haust. Alltaf blendnar tilfinningar að gefa út bók. En fyrirframgreiðslan dugar fyrir nýju pústkerfi undir Focusinn, sem eru frábærar fréttir,“ skrifar rithöfundurinn Dagur Hjartarsson á Facebook-síðu sína en hann sendir frá sér nýja skáldsögu í haust.

Myndin sýnir Dag með útgáfusamninginn fyrir aftan bílinn sinn sem nýtur góðs af þessum áfanga í lífi eiganda síns. Nýja bókin fer í prentun á næstunni og kemur út í haust. Um er að ræða dramatíska skáldsögu en Dagur er ekki tilbúinn að gefa upp titilinn á henni strax:

„Þetta er dálítið eins og þegar maður er búinn að ákveða nafn á barnið en á eftir að skíra.“

Dagur hefur áður sent frá sér eina skáldsögu, eitt smásagnasafn og þrjár ljóðabækur. Um efni nýju bókarinnar segir Dagur:

„Hún fjallar um konu sem skrifar bók sem leggur líf hennar í rúst og hún fær tækifæri til að gera upp sín mál.“

Þetta hljómar óneitanlega spennandi og Dagur játar því að sagan sé spennandi og segir jafnframt að hún taki óvænta stefnu.