Annarri æfingu Hatara á stóra sviðinu í Tel Aviv lauk fyrir stundu, en sveitin stígur á svið í fyrri undanriðlinum í Eurovision næstkomandi þriðjudag. Eftir æfinguna svöruðu Hataraliðar spurningum blaðamanna eins og venja er og streymdi FÁSES, félag áhugafólks um söngvakeppni evrópskra sjónvarpsstöðva, fundinum í beinni á Facebook.

Blaðamannafundurinn byrjaði með sprengju. Hljómsveitin var spurð út í hvort þeim þætti tjáningarfrelsi þeirra sett skorður. Því svaraði fundarstjóri og neitaði því fyrir þeirra hönd.

„Hún var að spyrja okkur,“ sagði þá Klemens.

Er þetta í annað sinn sem Hatarliðar koma fundarstjóranum í uppnám, en á blaðamannafundinum síðasta sunnudag komst sami fundarstjóri í uppnám þegar að blaðamenn spurðu Hataraliða um átökin á milli Ísrael og Palestínu.

Þá voru Hataraliðar einnig spurðir, á þessum öðrum blaðamannafundi, hvaðan þeir sækja innblástur í tónlistinni. Uppskáru þeir mikinn hlátur er þeir töldu upp nöfn á rokksveitum í bland við persónur eins og Theresu May, Donald Trump, Britney Spears og Spice Girls. Matthías og Klemens, söngvarar Hatara, voru einnig spurðir út í heimsókn sína til Hebron síðustu helgi.

„Við getum ekki svarað frjálslega því ástandið þar er mjög pólitískt, en vinur okkar sagði okkur að við þyrftum að fara þangað til að upplifa það sem er að gerast í þessu landi,“ sagði Matthías þá og Klemens bætti við að það hefði opnað augu hans fyrir ýmsu að heimsækja Hebron.

Hægt er að horfa á blaðamannafundinn hér: