Framlag Póllands til Eurovision í ár er kvartettinn Tulia sem flytur lagið Fire of Love, eða Pali się eins og það heitir á frummálinu. Í viðtali við pólska Eurovision-miðilinn Dziennik Eurowizyjny segja þær að Hatrið mun sigra með Hatara sé eitt af uppáhaldslögunum þeirra í keppninni, ásamt ítalska og portúgalska framlaginu.

„Íslendingar sýna gríðarlegt hugrekki. Við kunnum að meta hugrekki, sjálfstæði og hömluleysi í listsköpun,“ segja liðsmenn Tuliu. „Við finnum fyrir tengingu við Hatara því eins og þeir erum við með frumlegt framlag sem er ekki það sem fólk bjóst við og ekki tónlist sem massinn hlustar á.“

Pólsku flytjendurnir halda áfram að mæra Hataraliða.

„Fólk mun annað hvort kaupa þetta eða ekki en við kaupum Hatara, ekki aðeins vegna hugrekkis heldur einnig vegna heimspekilegs texta og fallegs viðlags. Þeir hljóma eins og blanda af Rammstein, Depeche Mode og einhverju mjög draumkenndu.“

Þá eru pólsku konurnar spurðar hvaða flytjanda í Eurovision þær myndu velja ef þær þyrftu að taka upp lag með einhverjum þeirra. Þá stendur ekki á svörunum.

„Hatara.“