Mót hækkandi sól – árleg vitundarvakning um geðheilbrigði fer fram í Háskólanum í Reykjavík 29. janúar til 31. janúar.

Dagana 29. janúar – 31. janúar verður haldin geðheilbrigðisvika í Háskólanum í Reykjavík þar sem boðið verður upp á fræðslu í hádeginu um ýmis viðfangsefni, svo sem svefn, kvíða, koffín og lyfjanotkun. Dagskráin samanstendur af hádegisfyrirlestri og málstofum um kvíða, líðan háskólanema og svefn. Viðburðirnir eru opnir öllum, auk þess sem hægt verður að fylgjast með þeim á netinu.

Sigrún Ólafsdóttir, sálfræðingur, ríður á vaðið  í dag, þriðjudaginn 29. janúar og  fjallar um kvíða og gefur góð ráð til að ná tökum á honum. Fyrirlestur Sigrúnar verður í stofu M105 kl. 12-13.

Málstofa um líðan háskólanema á Íslandi, Eru ekki allir hressir? verður haldin í hádeginu á miðvikudag 30. janúar í stofu M209. Þar kynnir Ingvar Eysteinsson, meistaranemi í klínískri sálfræði við HR, niðurstöður rannsóknar á algengi kvíðavandamála og þunglyndis á meðal nemenda í Háskólanum í Reykjavík. Jón Magnús Kristjánsson, yfirlæknir bráðalækninga Landspítalanum, ræðir lyfjamisnotkun háskólanema, áhrif þeirra og afleiðingar. Grétar Björnsson, félagsfræðingur og háskólanemi, ræðir áskoranir og líðan í háskólaumhverfinu og Sævar Már Gústavsson kynnir sálfræðiþjónustu HR og hvernig hún hefur nýst nemendum. Að erindum loknum verða pallborðsumræður þar sem meðal annars náms- og starfsráðgjafar HR taka þátt.

Málstofa um svefn verður svo haldin kl. 12-13:30 fimmtudaginn 31. janúar kl. 12-13:30 í stofu M104. Heiti hennar er Góða nótt: Svefn – skiptir hann máli fyrir líðan og frammistöðu? Þar halda Erna Sif Arnardóttir, Erla Björnsdóttir, Vaka Rögnvaldsdóttir, Hálfdán Steinþórsson, Ingibjörg Gunnarsdóttir og Sonja Björg Jóhannsdóttir erindi um svefn, svefnleysi, áhrif koffíns, reynslusögu af vökumaraþoni, afköst háskólanema og fleira.

Hægt verður að fylgjast með öllum viðburðunum í beinni útsendingu á netinu.

Dagskrá og nánari upplýsingar eru á vef HR.