Birgir Jónsson trommari þungarokkssveitarinnar Dimmu tilkynnti það fyrir stuttu, aðdáendum sveitarinnar til mikils harms, að hann hygðist leggja kjuðana á hilluna, í það minnsta sem trommuleikari sveitarinnar.

Hann settist í síðasta sinn fyrir aftan trommurnar með Dimmu á Litla Hrauni í dag, en þar lék sveitin ásamt Bubba Morthens fyrir fanga og starfsmenn. Bubbi hefur spilað þar á jólum í 30 ár.

Viktor Hólm Jónmundsson var með sem rótstjóri og móralskur stuðningur, en söngvarinn Stefán Jakobsson komst því miður ekki með.

„Síðasta gigg mitt sem meðlimur DIMMU er afstaðið og er það kannski við hæfi að það var í öryggisfangelsinu á Litla Hrauni í morgun ásamt Bubba, en hann hefur verið að fara þarna í rúmlega 30 ár.

Mikil forréttindi að fá að létta þessum mönnum lífið pínulítið á jólum því þó að ástæður þess að menn eru þarna séu ekki fallegar þá eru þarna inni góðir drengir sem hafa misst stjórn á lífi sínu og sem eiga fjölskyldur og ástvini sem þeir geta ekki eytt jólunum með.

Ég get alveg fundið til með þeim vegna þess og óska þeim alls hins besta við að koma sér á beinu brautina. Þeir eru þakklátir og það kemur blik í auga þegar maður heilsar þeim eins og mönnum og býður þá velkomna á giggið.

Verum góð við hvort annað elsku vinir og sérstaklega litlu börnin okkar. Gleðileg jól.“