Þáttastjórnandinn James Corden heldur áfram að fara á rúntinn með vinum sínum í Carpool Karaoke í þætti sínum The Late Late Show. Að vanda lendir hann í vandræðum að komast í vinnuna og gestur hans bjargar honum.

Gestur hans í síðasta þætti er söng- og leikkonan Barbra Streisand, sem er nýbúin að gefa út plötu þann 2. nóvember, þá 35. Í röðinni.

Í þættinum talar Streisand meðal annars um að hún féll nýlega þrisvar á skriflega ökuprófinu og að hún hringdi í Tim Cook, forstjóra Apple og bað hann að breyta framburði Siri á nafni hennar. Siri er tölvugerð aðstoðarkona notenda iPhone.

Einnig fjallar hún um sviðsskrekkinn sem hún þjáist ítrekað af og svarar Corden því til að þegar hann þjáist af sviðsskrekk þá ímyndar hann sér að hann sé Barbra Streisand.