Í apríl árið 1997 setti DV það í hendur matgæðinganna Úlfars Eysteinssonar, Drafnar Farestsveit og Sigmars B. Haukssonar að komast að því hvaða appelsínusafi væri bestur.
Alls voru 13 tegundir 100% hreinna safa smakkaðar og þeim gefnar stjörnur. Matið var gert út frá bragði, áferð og útliti en umbúðirnar skiptu engu máli.
Hæst skoraði Flórídana með 13 stjörnur af 15 mögulegum. „Gott appelsínubragð,“ sagði Úlfar. Þar á eftir komu nokkuð margir safar sem fengu 10 og 11 stjörnur, til dæmis Trópí, Rynkeby og Minute Maid.
Dómararnir voru mjög ósammála um Blöndu og sagði Sigmar safann vera „vatngutl“. Verstu einkunnina fengu Bónussafinn og Lindavia. Dröfn taldi þann síðarnefnda hljóta að vera skemmdan.
