Sjónvarpsþulan fyrrverandi og spákonan Ellý Ármanns skildi í fyrra við kærasta sinn og sagðist hafa gert mestu mistök ævi sinnar þegar hún fékk sér húðflúr með nafni hans. Ellý fékk sér nýtt flúr yfir nafnið hjá Reykjavík Ink.

Ellý lýsti því margoft yfir, meðal annars í viðtali við DV, að hún væri búin að fá nóg af ástinni, allavega í bili og hefur hún verið ötul við að mála listaverk til að greiða skuld við Arionbanka.

En örvar Amors láta ekki svona yfirlýsingar á sig fá og hefur ástin nú bankað aftur upp á hjá Ellý. Sá sem bankaði upp á er Hlynur Jakobsson, dj sem jafnframt á veitingastaðinn Hornið ásamt fjölskyldu sinni.

Samkvæmt heimildum DV hafa þau hist undanfarna mánuði, en þau kynntust í 101 þar sem þau búa bæði og starfa. Ellý leigir herbergi þar og Hlynur seldi fyrir nokkru hús í Kópavogi og keypti sér íbúð í Skuggahverfinu. Þau eru jafngömul, fædd 1970.

Ellý birti í gær mynd af þeim á Instagram ásamt eftirfarandi orðum: „Ör mín og sár þú straukst og kysstir. Þá vissi ég það.“