„Það er enginn Joe Biden – tekinn af lífi 2020.“ Stendur í færslunni og líklega hafa sumir velt því fyrir sér hvort Trump sé endanlega búinn að tapa sér.
Trump skreytti færsluna með mynd af sjálfum sér.
„Biden klónar og vélmennalegir, sálarlausir, hugsanalausir hlutir er það sem þú sérð,“ stendur einnig í færslunni sem var upphaflega birt af notandanafninu „Ilijh“ og Trump „endurtísti“.
En líklega þarf þessi „Ilijh“ einhverja aðstoð, að minnsta kosti ef aðrar færslur viðkomandi á Truth Social eru skoðaðar. Þar lýsir viðkomandi mikilli þörf fyrir „guðlegt inngrip“ varðandi alla þá satanista og barnaníðinga sem eru nánast í hverju horni að mati viðkomandi.
Þessi utan er fjöldi gyðingahaturssamsæriskenninga á síðu viðkomandi og sama á við um samsæriskenningar um „djúpríkið“. Meðal annars nýleg færsla þar sem því er lýst að rússneskar hersveitir í Úkraínu hafi „komið upp“ um leynilega aðstöðu þar sem viðskipti með börn og líffæri voru stunduð í samvinnu við ísraelsk samtök sem ræna, pynta, nauðga og drepa börn.
Trump er svo sem enginn nýgræðingur varðandi samsæriskenningar. Hann hélt því til dæmis lengi fram að Barack Obama hafi ekki fæðst í Bandaríkjunum og væri því ekki lögmætur forseti. Hann dró síðan í land með þetta og sagði að Hillary Clinton hefði komið þessum orðrómi af stað.
Svo má ekki gleyma staðlausum fullyrðingum hans um að rangt hafi verið haft við í forsetakosningunum 2020 en þeim fullyrðingum hefur ítrekað verið vísað til föðurhúsanna af bandarískum dómstólum.
