Trump situr á skrifstofu sinni dag hvern og á meðan hann skrifar undir nýjar tilskipanir um hvernig á að innrétta Bandaríkin og heiminn allan, baðar hann sig í spurningum frá útvöldum blaðamönnum.
Í greiningu á stöðu mála segir Jótlandspósturinn að á fyrstu þremur vikur Trump í Hvíta húsinu hafi það runnið upp fyrir Bandaríkjamönnum að þeir hafi ekki bara kosið forseta þann 5. nóvember, heldur einnig kóng sem telur sig hafinn yfir bandarísku stjórnarskrána og þingið og lítur á heiminn sem stóran vettvang fasteignaviðskipta.
Enn sem komið er, er ekkert sem heldur aftur af honum. Í nýrri skoðanakönnun CBS News sögðust 53% aðspurðra kjósenda vera ánægðir með Trump. 70% sögðu að Trump standi við kosningaloforðin og 58-69% lýstu honum sem „duglegum, einbeittum, kraftmiklum og óhefluðum“.
Þessar tölur eru algjör andstæða þeirrar ringulreiðar og ótta sem Trump og hægri hönd hans, Elon Musk, hafa skapað í bandaríska stjórnkerfinu og víðar.
