Domino’s pizzurnar vinsælu eru nú fáanlegar í gegnum Wolt-appið en pítsukeðjan mun sjálf afhenda pizzurnar í svokallaðri sjálfsafhendinu. Þetta kemur fram í fréttatilkynningu frá fyrirtækjunum þar sem greint er frá samstarfinu.

Fyrst um sinn verður hægt að panta frá völdum stöðum Domino´s í gegnum appið en með hverri vikunni munu fleiri staðir bætast við.

Þegar innleiðingin er full frágengin munu viðskiptavinir í Reykjavík, Kópavogi, Mosfellsbæ, Hafnarfirði, Reykjanesbæ, Gar∂abæ, Akureyri og Selfossi geta pantað sínar uppáhalds Domino’s pítsur í gegnum Wolt appið.

Í fyrrnefndri tilkynningu kemur fram að pítsur eru þriðji vinsælasti rétturinn sem Wolt afhendir á Íslandi á eftir hamborgurum og steiktum kjúklingi. Þar sem Domino’s er nú orðið fáanlegt í Wolt-appinu má gera ráð fyrir því að pítsurnar klifri ofar á listanum. Um það bil ein af hverjum sjö sendingum á Wolt inniheldur pítsu eins og er.

„Domino’s hefur lengi verið á listanum okkar yfir vörumerkin sem við viljum helst vinna með og við erum mjög spennt að fá þau loksins til okkar. Domino’s er þekkt vörumerki á Íslandi og við erum stolt af því að hjálpa til við að koma dýrindis pítsunum þeirra til enn fleiri. Vettvangur Wolt var byggður til að tengja fólk við mat sem það elskar og við erum spennt að bæta Domino’s við víðtækt net samstarfsaðila,“ segir Jóhann Helgason, forstöðumaður viðskiptastýringar Wolt á Íslandi.

Rétt er að taka fram að Domino’s mun halda áfram að sjá um sínar eigin sendingar.

„Við höfum verið að afhenda pizzur á Íslandi síðan 1993 og afhending hefur lengi verið okkar sérþekking. Við erum spennt að bjóða upp á pítsurnar okkar í Wolt appinu, en á sama tíma afhendum við allar okkar pantanir með okkar eigin bílstjórum. Markmið okkar hefur alltaf verið að gera frábærar pítsur aðgengilegri fyrir alla á Íslandi. Með því að taka höndum saman við Wolt erum við að stíga stórt skref í átt að því markmiði og við erum spennt að ná til fleiri viðskiptavina á nýjan hátt,“ segir Magnús Hafliðason, framkvæmdarstjóri Domino’s Pizza á Íslandi.