Jón Magnússon, lögmaður og fyrrverandi alþingismaður, þvertekur fyrir það að hann sé rasisti. Kollegi hans, Sveinn Andri Sveinsson, fór mikinn á dögunum þegar tilkynnt var um að Jón yrði á lista Sjálfstæðisflokksins fyrir komandi kosningar.
„Í 6. sæti er frambjóðandi sem er stútfullur af rasisma og óvildar í garð transfólks. Þannig hefur hann tekið undir hugmyndir þess efnis að hælisleitendur yrðu geymdir í Grænlandi, auk þess sem hann hefur gagnrýnt þjóðkirkjuna fyrir að taka upp hanskann fyrir transfólk.Vel gert Valhöll,“ skrifaði Sveinn Andri.
Í færslu á bloggsíðu sinni Jón gefur lítið fyrir upphróp Sveins Andra
„Margir hafa reynt það að þegar á það skortir að fólk geti fært rök fyrir máli sínu, þá grípur það til þeirra varna að hengja merkimiða á andmælendur sína. Fáir kunna þá list betur en stjörnulögmaðurinn Sveinn Andri Sveinson, sem hefur tapað fleiri málum fyrir rétti en flestir aðrir núlifandi lögmenn. Í pistli sem hann skrifar, þá vandræðast hann með að mér skuli hafa verið boðið sæti á lista Sjálfsæðisflokksins í Reykjavík norður og hengir á mig miða rasisma,Íslamsandúðar og transfóbíu. Ég kippi mér ekki upp við svona bull og merkimiða enda mátt þola þá á annan áratug,“ skrifar Jón.
Fullyrðir hann að ef að tekið hefði verið á hælisleitendamálum eins og hann hafi meðal annars lagt til á Landsfundi Sjálfstæðisflokksins árið 2015 þá væri engin vandamál varðandi málaflokkinn og útgjöld ríkisins 50 milljörðum lægri á ári.
„Varðandi meinta transfóbíu þá er sú nafngift röng. Ég hef hinsvegar sömu skoðun í þeim málum og höfundur Harry Potter bókanna J.K. Rawlings Svo því sé síðan bætt við sömu skoðun á lögunum um kynrænt sjálfræði og breska ríkisstjórnin, sem hafnaði að staðfesta slíka bullöggjöf frá skoska þinginu. Þannig fellur allt um sjálft sig í málflutningi Sveins Andra og það ekki í fyrsta skipti,“ segir Jón að lokum.
