„Ég hef skrifað greiningar og skoðanapistla um samfélagsmál í vel á annan áratug og langaði til að gera það áfram. Þetta virtist vera ágætis leið til að gera það,“

segir Þórður Snær Júlíusson blaðamaður í samtali við DV, en á morgun fer fyrsta fréttabréf hans í loftið. 

„Það heitir Kjarnyrt og þar ætla ég að birta reglulega greiningar og pistla um samfélagið, stjórnmál, efnahagsmál og viðskipti. „Bottom-up“ með hagsmuni heildarinnar og neytenda að leiðarljósi, ekki „top-down“ með sérhagsmuni þröngra valdakjarna í forgrunni,“ segir Þórður Snær á Facebook-síðu sinni. 

Þórður Snær stofnaði Kjarnann fyrir rúmlega ellefu árum og var ritstjóri hans þar til fjölmiðillinn sameinaðist Stundinni og varð að Heimildinni í lok árs 2022. Þar starfaði Þórður Snær sem annar ritstjórinn þar til í lok júlí í ár þegar hann tilkynnti að tími væri kominn til að skipta um takt og hann léti af störfum sem ritstjóri Heimildarinnar.

Aðspurður um hvort fréttabréfið Kjarnyrt verði í takt við fyrri greiningar þínar á Kjarnanum eða hann ætli að feta nýjar slóðir segir Þórður Snær:

„Ég held að þeir sem hafa fylgst með mér hingað til muni kannast vel við efnistökin en ég ætla líka að reyna að einskorða mig ekki við að benda á það sem er að, heldur vera lausnarmiðaðri og lyfta því sem vel er gert.“

Þórður Snær segir stefna að því að senda fréttabréf að minnsta kosti tvisvar í viku. Skráning er algjörlega frítt án skuldbindinga.

„Gerið það endilega sem flest, og sem fyrst. Ég yrði líka þakklátur ef þið gætuð deilt, deilt, deilt eins og vindurinn,“ segir Þórður Snær.