Sitjandi oddviti, Eyþór Arnalds, hefur lýst því yfir að hann hyggist gefa kost á sér áfram og tilkynnti Hildur Björnsdóttir í síðustu viku að hún vildi einnig leiða listann fyrir komandi kosningar.
Hildur og Eyþór mættust raunar í morgun í fyrsta sinn opinberlega, ef svo má segja, en þau voru bæði gestir í Silfrinu á RUV ásamt þeim Dóru Björt Guðjónsdóttur og Þórdísi Lóu Þórhallsdóttur borgarfulltrúum Pírata og Viðreisnar. Egill Helgason þáttastjórnandi beindi kastljósinu að oddvitaefnunum í upphafi þáttar og gerði Hildur grein fyrir ástæðum framboðs síns.
Reyndar má segja að nokkuð vel hafi farið á með þeim Eyþóri og Hildi í þættinum og átakalínurnar frekar milli fulltrúa meirihlutans í Reykjavík, þeim Dóru Björt og Þórdísi Lóu. Sást það hvað skýrast þegar tekist var á um samgöngu- og skipulagsmál í Reykjavík í þættinum.
Sagði Hildur að meirihlutinn hefði hvatt til menningarstríðs í borginni með því að tefla öfgunum saman, til dæmis í málefnum um þéttingu byggðar í borginni. Sagði Hildur þvert á móti að það væri alls ekki ein leið að því markmiði. „Mér finnst þessi umræða hennar [Dóru] og það hvernig meirihlutinn heldur á þessum málum sýna vel þessar öfgar sem ég tala gjarnan um, það sem ég vil kalla menningarstríð í borginni,“ sagði Hildur og vændi meirihlutann um að etja fólki saman eftir því hvernig lífi það vill lifa, eftir því hvernig það vill ferðast og hvar í borginni það vill búa.
„Töfrarnir eru þarna á milli,“ sagði Hildur og að það væri hægt að finna sanngjarna nálgun.
„Mér finnst þetta reyndar svolítið skemmtilegt orð,“ sagði Egill þá jafnframt um menningarstríðshugtak Hildar. „Það loga eldar á þessari víglínu.“
Egill vék þá umræðunni að Borgarlínunni og beindi, sem fyrr, fyrst orðum sínum að Sjálfstæðismönnunum við borðið.
Eyþór minnti þá á að hann hafi fyrst og fremst gagnrýnt það hvernig að Borgarlínuverkefninu hafi verið staðið innan Reykjavíkur og nefndi sérstaklega að akreinar hafi verið fjarlægðar til þess að rýma fyrir Borgarlínunni.
„Ertu í prinsippinu með Borgarlínu,“ spurði Egill Eyþór þá. „Ég er með Borgarlínu sem er skynsamleg,“ svaraði Eyþór. „Þar sem þú hins vegar tekur akreinar úr almennri umferð þá ertu í raun að þrengja að umferðinni, og það er stefna um að þvinga fólk til þess að taka almenningssamgöngur,“ sagði hann.
Þá vakti Eyþór athygli á því að aðgerðir sem boðaðar hafa verið til þess að styðja við það samgöngukerfi sem er við lýði í dag hafi ekki verið kláraðar og nefndi sérstaklega hugmyndir meirihlutans um að auka tíðni Strætó brottfara í sjö og hálfa mínútu. Sagðist Eyþór hafa stutt þær aðgerðir meirihlutans í samgöngumálum, en að þær hafi svo ekki verið framkvæmdar.