Áslaug Arna Sigurbjörnsdóttir, dómsmálaráðherra, hefur lagt fram frumvarp um breytingu á hjúskaparlögum. Lagðar eru fram fjórar breytingar í frumvarpinu, þar á meðal um aldur þeirra sem gifta sig og hjónavígslur erlendis.
Aldur hjónaefna
Samkvæmt núgildandi lögum mega tveir einstaklingar stofna til hjúskapar þegar þeir hafa náð 18 ára aldri en ráðuneytið getur veitt yngra fólki leyfi til að ganga í hjúskap ef að forráðamenn eru samþykktir hjúskapnum. Í nýja frumvarpinu er lagt til að undanþáguheimildin verði afnumin og einungis verði veittar undanþágur ef um hagsmuni aðilans sem er yngri en 18 ára er að ræða. Hjónavígslur sem fara fram erlendis þar sem aðili er undir 18 ára verða ekki viðurkenndar á Íslandi.
Könnun á hjónavígsluskilyrðum
Lagt er til að könnun til hjónavígsluskilyrða fari einungis fram hjá sýslumanni. Þá er lagt til að ráðuneytið geti með reglugerð ákveðið að fela einu sýslumannsembætti umrætt verkefni. Þess ber að geta að vígsluheimildir presta og forstöðumanna trú- og lífsskoðunarfélaga og umboðsmanna þeirra verða óbreyttar samkvæmt lögum.
Lögsaga í hjónaskilnaðarmálum
Lagðar eru til breytingar á ákvæðum hjúskaparlaga varðandi lögsögu íslenskra stjórnvalda og dómstóla til þess að veita lögskilnað hér á landi í tilteknum tilvikum ef hvorugur aðili býr hér á landi og viðkomandi eru ekki íslenskir ríkisborgarar.
Færsla verkefna frá ráðuneytinu til sýslumanna
Í fjórða lagi eru lagðar til breytingar sem snúa að því að færa verkefni frá ráðuneytinu til sýslumanna.
Drögin að frumvarpinu hafa verið birtar í samráðsgátt stjórnvalda og hægt verður að senda inn umsögn til 1. mars næstkomandi.