Það er yfirleitt ekki hægt að reiða sig sérlega mikið á skoðanakannanir sem eru gerðar á miðju kjörtímabili. Allt getur þokast til þegar færist nær kosningu. Við munum til dæmis þegar Píratar voru stærsti flokkurinn á Íslandi í skoðanakönnunum fyrir fjórum árum.
Það er samt athyglisvert að rýna aðeins í skoðanakönnun MMR sem birtist í dag. Helstu niðurstöðurnar eru þær að Sjálfstæðisflokkurinn hefur aldrei mælst minni hjá þessu fyrirtæki – og að á eftir honum koma fimm stjórnmálaflokkar allir með nokkuð svipað fylgi.
Sjálfstæðisflokkurinn fær 18,3 prósent í könnuninni, heilum 7 prósentustigum undir kjörfylginu 2017. Það hlýtur að teljast líklegt að niðurstaða eins og þessi magni upp úlfúð innan flokksins. Það hefur gerst í pólitíkinni að Miðflokkurinn hefur tekið upp mjög afgerandi hægri stefnu – og líklegt að fylgi sé fyrst og fremst að fara frá Sjálfstæðisflokknum þangað. Miðflokkurinn er kominn upp að hægri vængnum að Sjálfstæðisflokknum.
Maður rekur svo augun í að Framsóknarflokkurinn nær að sveifla sér upp, er í 11,8 prósentum sem er allmikið meira en hann hefur fengið í könnunum undanfarið. Miðflokkurinn er á svipuðu róli með 12 prósent. Miðflokkurinn hefur verið mjög erfiður ljár í þúfu fyrir Framsókn, en það gæti horft öðruvísi við ef Miðflokkurinn segir alveg skilið við þann þráð félagshyggju sem er þó alltaf í Framsókn.
Vinstri græn bæta líka við sig og eru með 12,8 prósent. Það er alveg viðunnandi á miðju kjörtímabili.
Svo eru það flokkarnir í kringum miðjuna, Samfylkingin sem er stærst með 14,8, Píratar með 12,4 prósent og Viðreisn með 10,2 prósent. Fylgið virðist vera á nokkurri hreyfingu milli þessara flokka en milli þeirra er talsverð samstaða í þinginu. Enginn þeirra nær þó að taka afgerandi forskot á hina.