Laugardagur 14.desember 2019
Eyjan

Þórhildur Sunna sver af sér frjálshyggjustefnu pírata – „Skoðun Álfheiðar er hennar eigin“

Ritstjórn Eyjunnar
Föstudaginn 1. nóvember 2019 16:06

Þórhildur Sunna Ævarsdóttir

Ekki missa af Helstu tíðindum dagsins í pósthólfið þitt

Lesa nánar

„Skoðun Álfheiðar er hennar eigin og hana ber ekki að skilja né mála upp sem stefnu Pírata, hvorki í heilbrigðis né menntamálum,“ segir Þórhildur Sunna Ævarsdóttir, varaþingflokksformaður Pírata vegna ummæla Álfheiðar Eymarsdóttur í dag.

Álfheiður segir á Facebook að einkarekstur í skólakerfinu og heilbrigðisþjónustunni sé eina lausnin til að bæta kjör og starfsumhverfi kennara. Telur hún að hið opinbera sé „glatað“ og gjarnan ófært um að hugsa vel um starfsfólk og ófært um rekstur:

„Hverfarekin heilsugæsla hljómar dásamlega. Samvinnufélög, góðgerðafélög, einkahlutafélög. Fjármunir verða látnir fylgja einstaklingum. Þá myndast eðlileg samkeppni um þetta frábæra starfsfólk og einhver von um eðlileg kjör og manneskjulegri starfsaðstæður. Hjallastefnan getur til að mynda boðið upp á sveigjanlegan vinnutíma starfsfólks í þeirra leikskólum og skólum. Og sveigjanlegan sumarleyfistíma fyrir börn á leikskólum. Hið opinbera sér sér ekki fært um að gera þetta. Á stöku stað er hægt að velja um sumarleyfistíma -en yfir það heila er þetta mjög stíft og kassalaga. Ég ætla ekki að minnast á biðlista og biðtíma í heilbrigðiskerfinu. Því það verður að segjast eins og er. Hið opinbera er ekki best (lesist: glatað, oft ófært um) í rekstri eða að hugsa vel um starfsfólk.“

Píratar grimmur hægri flokkur

Ekki eru allir sammála Álfheiði í athugasemdakerfi hennar og hún skömmuð fyrir að vera boðberi frjálshyggju.

Sósíalistinn Gunnar Smári Egilson deilir einnig færslu Álfheiðar og stenst ekki mátið að skjóta á Pírataflokkinn:

„Varaþingmaður Pírata boðar víðtæka einkavæðingu í skóla- og heilbrigðiskerfi. Í Frakklandi er sagt að sá sem heldur því fram að hann sé hvorki hægri né vinstri, sé hægri. Það sannast æ betur á Pírötum. Ekki síst í borginni, þar sem meirihlutinn rekur grimma hægri stefnu a la Viðreisn, en líka á þingi þar sem þingflokkurinn er eiginlega að renna saman við Viðreisn/Samfylkinguna.“

Einkarekstur ekki lausnin

Þórhildur Sunna segir Pírata eiga mjög ítarlega stefnu um báða málaflokkana, sem taki þó ekki afstöðu til einkareksturs, en þau markmið muni hinsvegar illa nást með einkarekstri:

„Stefna Pírata í menntamálum byggir á því að menntakerfi þjóni menntun hvers nemanda og að öllum sé tryggður möguleiki á að stunda nám við hæfi. Ekki er tekin afstaða með eða á móti einkarekstri. Stefna Pírata í heilbrigðismálum segir að kveða skuli á um rekstrarform í heilbrigðisáætlun, en að heilbrigðisþjónusta skuli vera gjaldfrjáls fyrir alla landsmenn, og að lyfjakostnaður vegna langvinnra sjúkdóma skuli ekki leggjast á sjúklinga. Það er heldur ekki tekin afstaða með eða á móti einkarekstri.

Þó ekki sé tekin sérstök afstaða til einkareksturs verður að segja að mörg þeirra markmiða og hugmynda sem finna má í stefnunum verður ekki náð með einkarekstri heldur þarf hið opinbera að koma til og því fer sannarlega fjarri að Píratar “boði víðtæka einkavæðingu í skóla og heilbrigðiskerfi” eins og Gunnar Smári heldur fram.“

Er þetta í annað skiptið í vikunni sem Þórhildur Sunna þarf að svara fyrir ummæli Álfheiðar, en Álfheiður taldi það skjóta skökku við að forsetafrúin Eliza Reid þæði verktakastarf hjá Íslandsstofu, líkt og tilkynnt var um í vikunni. Fannst henni forsetahjónin hafa sýnt dómgreindarleysi.

Vakti sú frétt nokkra athygli, en Þórhildur Sunna sagði í kjölfarið á samfélagsmiðlum að henni þætti ráðningin frábær og sæi enga hagsmunaárekstra í spilunum.

 

 

 

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.

Fleiri fréttir

Mest lesið

Ekki missa af

Eyjan
Fyrir 2 dögum

Sakar Helga um bullandi vanhæfi: „Vill einmitt svo skemmtilega til að eiginkona Helga Hrafns er forstöðumaður Siðmenntar“

Sakar Helga um bullandi vanhæfi: „Vill einmitt svo skemmtilega til að eiginkona Helga Hrafns er forstöðumaður Siðmenntar“
Eyjan
Fyrir 2 dögum

Styrmir: Hvar eru unglingahreyfingar stjórnmálaflokkanna?

Styrmir: Hvar eru unglingahreyfingar stjórnmálaflokkanna?
Eyjan
Fyrir 3 dögum

Íslendingar byrjaðir að hamstra – Örtröð í verslanir og Vínbúðir – „Alvöru dómsdagsstemning“

Íslendingar byrjaðir að hamstra – Örtröð í verslanir og Vínbúðir – „Alvöru dómsdagsstemning“
Eyjan
Fyrir 3 dögum

Kristján Þór lofar óháðri rannsókn – „Stórtíðindi“

Kristján Þór lofar óháðri rannsókn – „Stórtíðindi“