Í síðustu viku samþykktu ríkið og sveitarfélögin á höfuðborgarsvæðinu nýjan samgöngusamning. Eyþór Arnalds, oddviti Sjálfstæðismanna í borgarstjórn, hefur gagnrýnt samninginn. Flokksbræður hans, sem sitja í bæjarstjórastólum nágrannasveitarfélaga Reykjavíkur, eru hins vegar ekki sömu skoðunar og undirrituðu samninginn. Sumir sveitarstjórnafulltrúa Sjálfstæðisflokksins í bæjarstjórnum á höfuðborgarsvæðinu eru sagðir hafa orðið fyrir vonbrigðum með viðtökur Eyþórs á samningnum.

Fréttablaðið skýrir frá þessu í dag. Allir bæjarstjórarnir, sem skrifuðu undir samninginn eru Sjálfstæðismenn, en borgarstjóri er Samfylkingarmaður. Auk þeirra skrifuðu forsætisráðherra, fjármálaráðherra og samgönguráðherra undir samkomulagið.

Það er til fimmtán ára en á þeim tíma verður um 52 milljörðum varið í stofnvegi, tæpum 50 milljörðum í innviði borgarlínu og almenningssamgöngur, rúmlega 8 milljörðum verður varið í göngu- og hjólastíga, göngubrýr og undirgöng. Rúmlega 7 milljarðar eiga síðan að fara í bætta umferðarstýringu og sértækar öryggisaðgerðir.

Eyþór hefur gagnrýnt samkomulagið og hefur kvartað yfir samráðsleysi við gerð þess. Margir flokksbræðra hans á sveitarstjórnarstiginu segja þetta ekki rétt og hafa meðal annars bent á að Eyþór hafi verið boðaður á stóran samráðsfund þann 11. september en hafi ekki látið sjá sig. Hefur fréttablaðið eftir tveimur bæjarstjórnarfulltrúum Sjálfstæðisflokksins á höfuðborgarsvæðinu að eftir þessu hafi verið tekið.