Alþingi lauk störfum í gær og þingmenn fóru í sumarfrí. Fjármálaáætlun var samþykkt með atkvæðum stjórnarþingmanna en þingmenn Pírata, Samfylkingar og Viðreisnar voru á móti. Þingmenn Miðflokksins og Flokks fólksins sátu hjá. Bjarni Benediktsson, fjármála- og efnahagsráðherra, segir niðurstöðuna góða miðað við þær breyttu aðstæður sem eru í efnahagskerfinu.  Gjaldþrot WOW air og önnur slæm tíðindi hafi orðið til þess að nýlegar hagspár hafi verið teknar til endurskoðunar.

Fréttablaðið skýrir frá þessu í dag. Fram kemur að ekki hafi náðst að ljúka meðferð allra þeirra mála sem ríkisstjórnin lagði fram á nýloknum þingvetri og einnig eigi forsætisnefnd þingsins eftir að ljúka málum. Þar á meðal er að taka afstöðu til kvörtunar Ásmundar Friðrikssonar undan Þórhildi Sunnu Ævarsdóttur. Siðanefnd þingsins komst að þeirri niðurstöðu í maí að Þórhildur hefði brotið gegn siðareglum þingsins með ummælum um Ásmund.

Ekki náðist að ljúka afgreiðslu frumvarps um þjóðarsjóð en það var tilbúið til annarrar umræðu. Skiptar skoðanir eru um málið og var fjórum sérálitum skilað um það í meðförum þingnefndar.

Þá áttu ráðherrar eftir að svara 162 spurningum þingmanna. Ekki er útilokað að svör við einhverjum þeirra hafi borist þinginu síðar í sumar þegar ljúka á umræðum um þriðja orkupakkann.