Líf Magneudóttir, borgarstjóraefni Vinstri grænna í Reykjavík, sat fyrir svörum í Beinni línu DV nú í dag. Þar kom hún meðal annars inn á mögulegt samstarf með Sjálfstæðisflokknum, en sem kunnugt er vinna flokkarnir saman í ríkisstjórn.

Bjartmar Oddur Þeyr Alexandersson, blaðamaður DV, spurði Líf hvort henni gæti hugnast samstarf við Sjálfstæðisflokkinn að loknum kosningum:

„Ég hef alltaf talað um það að ég vilji starfa áfram í þessum meirihluta að þeim verkum sem við höfum hrint í framkvæmd á þessu kjörtímabili í einhverri mynd,“

svaraði Líf til.

Þetta taldi Bjartmar vera æft svar og gekkst Líf við því að Svavar Gestsson, fyrrum ráðherra, hefði kennt henni að svara með diplómatískum hætti í fjölmiðlum. Bjartmar spurði þá Líf aftur, hvort VG gæti unnið með Sjálfstæðisflokknum, þrátt fyrir gagnrýni hans á meirihlutann og með hliðsjón af þeim breytingum sem þeir vilja gera í borginni:

„Það er einhvernvegin þannig að stefna Sjálfstæðisflokksins í dag er þvert á stefnu VG, það er enginn samstarfsgrundvöllur.

Svo veit maður ekkert hvaðan þau eru að koma, því Eyþór segir að hann vilji ekki borgarlína meðan Hildur vill fá borgarlínu.“

Blaðamaður: „En geturðu unnið með þeim já eða nei?“

„Það er enginn samstarfsgrundvöllur.“