Stríðið í Sýrlandi hefur orðið uppspretta samsæriskenninga í mæli sem varla hefur þekkst áður – jú, 11/9 gaf forsmekkinn og kannski má segja að það séu að nokkru leyti sama manntegundin sem er ginnkeypt fyrir sæmsæriskenningum um báða atburðina, þá helst fólk yst á vinstri og hægri vængjum stjórnmálanna.
Hér hafa líka mikil áhrif allir nýju samskiptamiðlarnir, notkun og misnotkun þeirra, og hversu auðvelt er í raun að nota þá til að hræra í almenningsálitinu og koma fölskum fréttum og furðusögum á kreik. Það sem virðist eitthvert smáræði sem sett er fram til að sá efasemdum, getur verið partur af skipulagðri aðgerð sem endurómar víða um alnetið.
Maður sér samsæriskenningarnar um Sýrland á hverjum degi á samskiptamiðlunum. Sumt af því er orðið svo þrálátt að maður er eiginlega hættur að taka eftir því – en það hefur samt sín áhrif. Meginkenningin er sú að alþjóðlegir fjölmiðlar eins og BBC, Guardian CNN, New York Times og fleiri (sem geta talist meginstoðir hefðbundinnar fréttamennsku í vestrænum lýðræðisríkjum) séu í bandalagi með hjálparstofnunum og mannréttindasamtökum, öllum ríkisstjórnum á Vesturlöndum, Saudi-Arabíu, íslömskum öfgamönnum og al-Qaeda um að að taka völdin í Sýrlandi.
Um þetta má lesa mjög upplýsandi grein á vef BBC, en þar kemur meðal annarra við sögu Vanessa Beeley sem var flutt hingað til Íslands nýskeð og hélt fund sem Katrín Jakobsdóttir sótti. Hún er sögð vera í tengslum við vefsvæði sem gerir út á samsæriskenningar og hneigist til öfgahægrimennsku.
Annar liðsmaður í upplýsingastríðinu um Sýrland er Sarah Abdallah. BBC birtir mynd af henni. Hún hefur marga fylgismenn á samskiptamiðlum og heldur ákaft með Assad og Rússum. Hún segist á Twitter vera stjórnmálaskýrandi frá Líbanon, en hængurinn er sá, samkvæmt BBC-greininni, að annars er varla hægt að finna neitt um hana á netinu. En greining sýnir að þeir sem deila mest frá Sarah Abdallah eru Rússar og bandamenn þeirra, stuðningsmenn Trumps, meðlimir öfgahægrisamtaka í Evrópu, samsæriskenningasmiðir og þeir sem teljast vera alt-right.
Hættan af þessu er margvísleg. Sumt virkar dálítið hjákátlegt, eins og linnulaust hatrið á Hillary Clinton sem birtist hér að neðan. Það sést víða í Sýrlandsáróðrinum. En það er alvarlegra að þarna er gerð linnulaus tilraun til að grafa undan alvöru fréttamennsku og upplýsingastreymi. Stöndugir og sjálfstæðir fjölmiðlar eru hornsteinn hins frjálslynda vestræna lýðræðis. Þá er ekki að finna í Rússlandi eða Kína. Víða um heim eiga þeir í vök að verjast. Við erum stöðugt að fá þau skilaboð að ekki sé meira að marka þá en einhverja bloggara sem geta þess vegna verið gervifyrirbæri,, sannleikurinn sé kolafstæður og í raun engin leið að nálgast hann. Meira að segja forseti Bandaríkjanna er í þessu liði. Þannig magnast tilfinningin af óvissu og glundroða þar sem öllum gildum er snúið á hvolf. Það er í raun hægt að segja hvað sem er án ábyrgðar.
