Ruben Amorim, stjóri Manchester United, er viss um að félagið muni snúa aftur til fyrri hæða en getur ekki lofað því að hann verði á svæðinu þegar það gerist.
Amorim tók við United síðla hausts af Erik ten Hag en hefur ekki tekist að snúa skelfilegu gengi liðsins við. United situr í 14. sæti ensku úrvalsdeildarinnar, er dottið úr báðum bikarkeppnum en bindur enn vonir við árangur í Evrópudeildinni.
„Ég veit ekki hvort ég verði hér en miðað við hvernig við erum að hugsa núna munun við snúa aftur og sigra í framtíðinni. Við erum að gera margt en við erum ekki að vinna leiki. Þegar það tekst ekki þarf stundum að skipta fólki út,“ sagði Amorim við blaðamenn í dag fyrir leikinn gegn Real Sociedad á morgun.
Sir Jim Ratcliffe tók við fótboltahlið reksturs United í sumar og hefur hann verið duglegur við að segja starfsfólki upp.
„Við erum að taka erfiðar ákvarðanir sem félag. Fólk hefur misst starf sitt en við erum að gera það sem þarf til að sigra í framtíðinni,“ sagði Amorim.
