Þorkell Gunnar Sigurbjörnsson, íþróttafréttamaður á RÚV, var gestur Helga Fannars og Hrafnkels Freys í nýjasta þætti af Íþróttavikunni á 433.is

Arnar Gunnlaugsson var í vikunni ráðinn þjálfari íslenska karlalandsliðsins, en það hafði legið lengi í loftinu. Þorkell telur að ekki eigi að setja of mikla pressu á að hann komi Strákunum okkar á HM á næsta ári, þar sem liðið er í undankeppni með Frakklandi eða Króatíu, Úkraínu og Aserbaídjan.

„Ekki horfa bara í þessa undankeppni. Það er bara mjög ólíklegt að við séum að fara á HM í Mexíkó, Bandaríkjunum og Kanada. Við eigum bara að horfa á EM 2028, allt fram að því er bónus,“ sagði Þorkell í þættinum.

„En auðvitað viljum við sjá framför á liðinu. Við viljum ekki sjá neina afturför. En hausverkurinn hlýtur fyrst og fremst að vera að smíða varnarlínu,“ bætti hann við.

Hrafnkell tók þennan bolta á lofti.

„Ég held það sé tækifæri til að fara í þriggja manna vörn. Við erum með leikmenn eins og Mikael Egil að spila vængbakvörð í Venezia. Við erum með Guðlaug Victor sem er kominn í hafsentinn hjá Plymouth. Við erum með Sverrri og Hörð. Hörður getur verið vinstra megin þegar hann verður heill, er í raun bestur þar. Svo er fullt af mönnum sem geta spilað vængbakvörð. Þá komum við fyrir þremur miðjumönnum og tveimur framherjum. Ég held að það gæti verið góð lending.“

Íþróttavikan er í boði Bola léttöl, Lengjunnar og Happy Hydrate