Aron hefur alltaf verið opinn um sína fortíð og hvernig hann gekk í gegnum dimma dali til að komast á þann stað sem hann er í dag. Þegar hann var um sautján ára gamall byrjaði hann á sterum og fann fyrst fyrir miklum andlegum veikindum. Hann varar við steranotkun, sem hann segir því miður of algenga meðal ungra drengja.
Brotið er hluti af nýjasta þætti af Fókus, hægt er að horfa á hann í heild sinni hér og hlusta á Spotify.
Aron hélst illa í vinnu þegar hann var í neyslu og liðu tvö ár þar sem hann var atvinnulaus og notaði alla daga. Til að fjármagna neysluna seldi hann stera og fíkniefni. Sjálfur notaði hann stera sem höfðu mikil áhrif á geðheilsu hans.
„Ég prófaði stera fyrst þegar ég var sautján, átján ára, ég vissi ekkert hvað ég var að gera,“ segir hann.
„Ég byrjaði að dæla fullt af hormónum í mig og svo hætti ég, ég vissi ekkert en maður á að fara á svona post cycle therapy þar sem þú tekur ákveðnar töflur til að koma hormónum í rétt stand aftur. Ég gerði það ekki og varð ógeðslega þunglyndur. Út frá þessu fann ég fyrst fyrir andlegum veikindum af einhverjum miklum þunga, það var út af sterum.“
Aron segist hafa tekið eftir því að steraneysla meðal ungra drengja undanfarin ár hafi aukist, enda sé auðvelt aðgengi í gegnum ákveðin forrit.
„Þegar ég var yngri þá var þetta ekki alveg svona auðvelt, en svo var byrjað að selja á Facebook, þá var mjög auðvelt að hitta á sala. Svo kom þetta Telegram, ég myndi segja að þetta hlýtur að vera að aukast ef eitthvað er, manni finnst þetta versna með tímanum,“ segir hann.
Aron var sjálfur að selja stera og ýmis fíkniefni en var ekki djúpt sokkinn í undirheimana.
„Ég var aðallega í einhverjum litlum partýjum, en maður hitti auðvitað inn á milli svona gaura […] En ég myndi ekki segja að ég hafi verið djúpt inn í undirheimunum.“
Aron segir að það hafi gengið ágætlega fyrst um sinn þegar hann var að selja e-töflur en síðan var hann komst í krappan þegar hann byrjaði að selja kókaín, en hann neytti sjálfur efnisins og var háður því.
„Þá var maður að berjast við að vera á sléttu og með tímanum var maður orðinn svo kærulaus að maður fór að skulda og þetta fór einhvern veginn allt til fjandans. Ég held að það sé yfirleitt þannig,“ segir hann.
Aron ræðir þetta frekar í þættinum sem má horfa á hér og hlusta á Spotify.
Fylgdu Aroni á Instagram og smelltu hér til að fylgja Götustrákum og horfa á þættina.
