Frá þessu er greint í forsíðuumfjöllun Heimildarinnar í dag.
Í umfjölluninni er meðal annars vísað í orð sem Þorsteinn lét falla í yfirheyrslu hjá embætti héraðssaksóknara sumarið 2020. Þar sagðist hann ekkert hafa haft með manninn að gera og átti þar við Jóhannes. Er bent á að það rími ekki við uppgötvun rannsakenda hjá héraðssaksóknara á umræddum smáskilaboðum.
Í umfjöllun Heimildarinnar kemur fram að tölva Jóhannesar hafi tekið öryggisafrit af símanum um það leyti sem hann lét af störfum hjá Samherja. Í þessum skilaboðum birtist önnur mynd af samskiptum hans við forstjóra og aðra starfsmenn Samherja en forsvarsmenn fyrirtækisins hafa lýst.
Bent er á það í umfjölluninni að Jóhannes hafi verið við störf í Namibíu á árunum 2011 til 2016 og skilaboðin sem tókst að endurheimta spanni meirihluta þess tíma.
Eru skilaboðin sögð varpa nýju ljósi á samskipti Jóhannesar og Þorsteins í tengslum við samband Samherja og namibískra ráðamanna. Sem kunnugt er bíða umræddir ráðamenn eftir dómi í Namibíu fyrir að þiggja háar greiðslur frá Samherja.
Nánar er fjallað um málið í Heimildinni í dag.
