Grænlendingar eru argir vegna þess að Danir sviptu flugvöllinn í Nuuk alþjóðaflugvallaleyfinu. Segja Danir að öryggi sé ekki nægt á vellinum.

Danir sviptu Nuuk flugvöll alþjóðlegu leyfi um miðjan ágúst mánuð samkvæmt miðlinum Nunatsiaq News. Samkvæmt Farþegaflugs og lestarstofnun Danmerkur er öryggi ekki nægt á öryggissvæði flugvallarins.

„Þar sem öryggi á flugvöllum er mikið trúnaðarmál getum við ekki farið út í smáatriði um hvaða öryggismál eru ekki í lagi,“ sagði Christian Vesterager, forstjóri stofnunarinnar í fréttatilkynningu. „Fyrir farþega í Nuuk þýðir þetta að um tíma verður aðeins hægt að fljúga til og frá öðrum stöðum í Grænlandi.“

Ný flugstöð er í byggingu og stefnt er að því að klára hana í haust. Meðal annars nýtt tollasvæði. Í dag er aðalflugvöllur Grænlands í Kangerlussuaq en einnig hefur verið millilandaflug til og frá Nuuk flugvelli, meðal annars frá Íslandi.

Mánuður

Þessi svipting hefur valdið farþegum og flugfélaginu Air Greenland miklum vandræðum. Búist var við því að þessu yrði kippt fljótt í liðinn en það er ekki raunin.

Í frétt danska miðilsins CPH Post frá því í gær segir að Nuuk flugvöllur sé enn sviptur leyfinu, næstum mánuði síðar. Danir hafa í tvígang neitað að veita leyfið að nýju. Stjórnmálamenn eru nú byrjaðir að skipta sér af málinu.

Á mánudag funduðu Múte B. Egede, forsætisráðherra, og Hans Peter Poulsen, innviðaráðherra, með stjórnarformanni flugvallarins og yfirmanni flugvalla Grænlands.

„Ástandið er óviðunandi og við væntum þess að áhersla verði lögð á að leysa málið,“ sagði Egede.

Kínverjar hafa boðist til þess að byggja flugvelli á Grænlandi og fara ekki leynt með að þeir seilast til áhrifa í landinu. Vegna þessarar hættu ákváðu Danir að fjármagna helming af flugvallaframkvæmdum í landinu.