Lögreglan á Suðurnesjum biður fólk um að fara varlega og gæta að öryggi sínu hyggist það skoða eldgosið sem hófst í gærkvöldi.

Í færslu á Facebook-síðu lögreglunnar kemur fram að í nótt þurfti að sækja göngumann á svæðinu sem féll í sprungu, slasaðist hann eitthvað.

Hámarkshraði á Reykjanesbraut milli Grindavíkurvegar og Vogavegar hefur verið lækkaður í 50 km/klst.

„Mikið er um að fólk sé að leggja bílum úti í kanti og við það skapast ákveðin hætta sem við viljum sporna við. Einnig er vert að benda á að það er gríðarlega erfitt og hættulegt að fara á fæti að gosstöðvunum þar sem hraunið þarna er mjög erfitt yfirferðar á göngu, einnig er mikið um sprungur á svæðinu. Endilega farið varlega þarna og gætið að öryggi ykkar.“