Höfundur Staksteina Morgunblaðsins í dag fjallar um umræðuna í íslensku samfélagi nú þegar aðeins tveir dagar eru til kosninga. Er sjónum beint að frásögn Bubba Morthens sem sagði frá því á dögunum að hann hefði fengið gusur yfir sig eftir að hann opinberaði stuðning sinn við Katrínu Jakobsdóttur.

Bent er á að fram undan sé það sem stundum er kallað lýðræðisveisla en almennt nefnt kosningar. Lýðræðisveisla sé þó ekki út í bláinn því að lýðræðið sé mikils virði og þær þjóðir sem búa við það fyrirkomulag ættu að gleðjast í hvert sinn sem þær fá að nýta kosningaréttinn.

„Þetta á vita­skuld einkum við um þær þjóðir þar sem lýðræðið er raun­veru­legt, en of mörg dæmi eru um það að lýðræðið sé lítið annað en nafnið eitt og kosn­ing­ar skekkt­ar á marg­an hátt. En það eru ekki all­ir glaðir þegar dreg­ur að kosn­ing­um og sum­ir fyll­ast heift. Þeir láta sér ekki duga stuðning við ein­staka fram­bjóðend­ur eða mál­efna­lega gagn­rýni á aðra, held­ur ráðast með of­stopa á bæði fram­bjóðend­ur og stuðnings­menn þeirra.“

Í Staksteinum kemur fram að Bubbi hafi lýst þessu ágætlega og hann spurt eftirfarandi spurninga:

„Hvað fær fólk til að senda ljót skila­boð, krefja mann um skýr­ing­ar, hóta manni, ógna manni? Fara inn á heimasíðu manns með dólg, viðhafa orðbragð sem viðkom­andi myndi aldrei nota heima hjá sér?“

Staksteinahöfundur spyr hvort fólk geti ekki stillt sig.

„Svo nefn­ir hann dæmi sem eru þess eðlis að ekki er hægt að hafa þau eft­ir hér. Hvernig væri að fólk reyndi að stilla sig? Það virðist að vísu erfitt á Facebook og slík­um miðlum, en er ekki samt sjálfsagt að reyna?“

Bubba ofboðið eftir allt hatrið – „Hvað fékkstu borgað fyrir að sleikja hóruna? Ertu að borga fyrir listamannalaunin?“