Harmleikur átti sér stað í bænum Colonie í New York fylki í dag. Lögreglumaður skaut til bana eiginkonu sína og tíu ára gamlan son en 15 ára sonur hans var ekki heima. Eftir voðaverkin lagði hann eld að húsi sínu og skaut síðan sjálfan sig til bana.
Sem von er hefur málið vakið mikinn óhug á svæðinu en umfram allt undrun. Morðinginn, hinn 44 ára gamli Israel Roman, hefur aldrei verið orðaður við heimilisofbeldi né önnur afbrot og ekki var vitað til að nein vandamál væru í hjónabandinu. Orsök morðsins er því með öllu hulin en hins vegar virðist atburðarásin liggja ljós fyrir, eins og rakið hefur verið hér að ofan.
Líkin þrjú fundust í hjónarúminu.
Nokkrum dögum fyrir harmleikinn fór Roman með byssur í einkaeign sinni til byssusala og seldi þær. Að öðru leyti er ekkert óvenjulegt vitað um ferðir hans né atferli undanfarna daga og ekki er vitneskja um nein vandamál í hjónabandinu.
