Miðað við ummæli Medvedev þá mun stríðið hugsanlega ekki eingöngu verða háð innan landamæra Kherson, Zaprorizzjzja, Luhansk, Donetsk og Krím, sem Rússar hafa nú þegar innlimað ólöglega. Rétt er að hafa í huga að Rússar eru ekki með full yfirráð yfir þessum svæðum að Krímskaga undanskildum.
„Hvar eigum við að stoppa? Ég veit það ekki. Út frá því sem ég segi (um að búa til öruggt hlutlaust svæði, innsk. blaðamanns) verðum við að leggja hart að okkur. Verður það Kyiv? Já, kannski verður það Kyiv. Ef ekki núna, þá kannski síðar, örugglega á öðrum tímapunkti í þróun þessa stríðs,“ sagði Medved.
Hann er þekktur fyrir að ganga langt með ummælum sínum, meðal annars með því að tala um kjarnorkustríð við Vesturlönd. Hann veitist oft að Vesturlöndum og NATO þegar hann skýrir áhuga sinn á Kyiv, sem hann segir vera rússneska borg.
„Þrátt fyrir að Kyiv sé rússnesk borg, þá er hún undir stjórn alþjóðlegs hóps, undir forystu Bandaríkjanna, andstæðinga Rússlands. Allir sem gegna ábyrgðarstöðum þar, eru samviskulausir leppar eða óttast framtíð landsins eða hvaða tækifæri bjóðast. Allar ákvarðanir eru teknar hinum megin við Atlantshafið og í höfuðstöðvum NATO. Það er augljóst og þess vegna verðum við hugsanlega einnig að taka Kyiv,“ sagði hann.
Ummæli hans falla vel að þeim efasemdum sem margir vestrænir sérfræðingar hafa um varanlega friðarsamning við Rússa. Þessir efasemdarmenn telja að Rússar hafi ekki einungis í hyggju að hernema fyrrgreind héruð, þeir vilji leysa Úkraínu upp sem ríki og í kjölfarið muni þeir hugsanlega beina sjónum sínum að öðrum ríkjum.
