Í tilkynningu á Facebook-síðu HS Orku kemur fram að aðgerðir dagsins við að tengja Njarðvíkuræðina, heitavatnslögnina frá Svartsengi til Reykjanesbæjar, hafi tekist vel og nú streymi um 70 lítrar á sekúndu í gegnum hana áleiðis í heitavatnstanka HS Orku á Fitjum. Enn sem komið er verði ekki séð að lekar séu á nýju lögninni sem lenti að hluta undir hrauninu.
Þrýstingur verði aukinn hægt og rólega fram eftir kvöldi í samvinnu við HS Veitur þar til fullum afköstum verði náð. Suðuvinnu hafi lokið um þrjúleytið í dag og þá hafi strax verið hafist handa við að dæla rólega inn á lögnina til að sjá hvað hún þyldi. Óttast var að skemmdir hefðu orðið á þeim hluta hennar sem fór undir hraun auk þess sem hitabreytingar við inndælingu hafi getað valdið því að lögnin skryppi saman og tog kæmi á hana. Það hafi ekki gerst. Á þeim hluta lagnarinnar sem búið var að sanda og fergja séu vísbendingar um að hitastigið sé ekki mjög hátt miðað við aðstæður en lögnin var á tveggja metra dýpi áður en hraunið rann.
Ekki sé sjálfgefið að aðgerð af þessum toga, við jafn krefjandi aðstæður og raun ber vitni, gangi áfallalaust fyrir sig. Það hafi þó verið reyndin í dag og beri að þakka það öruggum og vönduðum vinnubrögðum starfsmanna HS Orku og verktakanna HD Framtak og Ellert Skúlason.
Í tilkynningu á Facebook-síðu HS Veitna kemur fram að frá heitavatnstönkunum á Fitjum verði svo hleypt rólega inn á dreifikerfið inn á ákveðin svæði í einu. Sé það gert til að vernda dreifikerfið, minnka líkur á lekum, lofttæma lagnirnar og byggja upp þrýsting á kerfinu.
Gott sé að íbúar hafi hitastilla lágt stillta og hækki ekki hitann fyrr en ofnar eða gólfhitakerfi byrja að hitna, og hækki síðan hitastilla í rólegheitunum í nokkrum þrepum.
