Ekki leið á löngu þar til einn úkraínskur sjávardróni hæfði skipið og upp gaus mikið eldhaf. Rússnesk korvetta, sem kostaði sem svarar til 10 milljarða íslenskra króna, varð að eldhafi. Hún hét Ivanovet.
Þetta gerðist aðfaranótt fimmtudags í Donuzlav flóa sem er við Krímskaga sem er hersetinn af Rússum. Margir erlendir fjölmiðlar hafa skýrt frá þessu síðustu daga.
Rússneski herbloggarinn Voenkor Kotenko skrifaði á Telegram að rússneska korvettan hafi sokkið eftir að þrír úkraínskir sjávardrónar hæfðu það.
Af myndum að ráða var um korvettu af gerðinni Tarantul eða Project 12411 að ræða. BBC segir að það kosti sem svarar til um 10 milljarða íslenskra króna að smíða eitt slíkt skip.
Drónaárásin var vel samhæfð en sex sjávardrónar voru notaðir við hana að sögn úkraínska hersins. Það var sérsveit, sem gengur undir nafninu Group 13, sem gerði árásina. Í færslu á Telegram sagði úkraínska varnarmálaráðuneytið að drónar hafi hæft skrokk korvettunnar sem hafi ekki verið siglingafær á eftir og hafi síðan sokkið. Það sagði einnig að björgunaraðgerð Rússa á vettvangi hafi misheppnast.
Olexander Scherba, embættismaður hjá úkraínska hernum, sagði árásina vera „áhrifamikla“. Hann sagði að fyrsti dróninn hafi hæft skipið klukkan 03.45 og klukkan 04 hafi öll áhöfnin verið búin að yfirgefa það. Það hafi því ekki verið nokkur möguleiki á að hægt hefði verið að bjarga skipinu.
Samkvæmt því sem miðillinn The Warzone segir þá átti árásin sér stað rúmlega 200 kílómetra frá næstu úkraínsku höfn en líklega voru drónarnir sjósettir frá móðurskipi mun nær skotmarkinu.
Sérfræðingar telja líklegt að drónunum hafi verið stýrt í gegnum gervihnött.
Hér fyrir neðan er hægt að sjá upptöku frá úkraínska hernum af árásinni.
