Greint var frá því á þriðjudag að Vilhjálmur hefði gert athugasemd við uppistand Helga Brynjarssonar, sonar Brynjars Níelssonar, á umræddu þorrablóti.
Í umfjöllun Smartlands, sem tilheyrir Morgunblaðinu og mbl.is, var Helgi annars vegar sagður hafa kallað Vilhjálm „leðurhomma“ og hins vegar „BDSM-lögmann“.
Sjá einnig: Brynjar hæðist að Vilhjálmi eftir uppákomuna á þorrablótinu – Nýjasti kaflinn í erjum þeirra
Vilhjálmur gerir þetta að umtalsefni í aðsendri grein sem birtist á vef Vísis í morgun.
„Í Mogganum í fyrradag var bein tilvitnun í starfsmann þingflokks Sjálfstæðisflokksins og haft eftir honum í fyrirsögn „Það er BDSM-lögmaður að trufla showið mitt”. Stuttu áður (71 mínútu) hafði Mogginn birt sömu frétt með beinni tilvitnun í sama mann með fyrirsögninni „Það er einhver leðurhommi að að trufla showið mitt”.“
Vilhjálmur segir að Mogganum sé að sjálfsögðu frjálst að breyta fyrirsögnum á eigin fréttum eins og honum sýnist. Hins vegar vandist málið þegar fyrirsögn er ætlað að vera bein tilvitnun í orð annarra.
„Því þá vaknar sú spurning hvað viðkomandi, í þessu tilviki starfsmaður þingflokks Sjálfstæðisflokksins, sagði í raun og veru: A) Það er einhver leðurhommi að trufla showið mitt? B) Það er BDSM-lögmaður að trufla showið mitt? eða C) Hvorugt? (sem er rétt, ég var á staðnum),“ segir hann.
Vilhjálmur segir í grein sinni á Vísi að eftir standi hvers vegna maðurinn sem vísað er til í beinni ræðu í fyrirsögn fréttarinnar breyttist úr „leðurhomma“ í „BDSM-lögmann“ á rúmri klukkustund eftir birtingu fréttarinnar og fjórum dögum eftir að ummælin áttu að hafa fallið.
Vilhjálmur veltir þessum vinnubrögðum fyrir sér.
„Mogganum er frjálst að kalla mig leðurhomma, BDSM-lögmann, trukkalessu, eða hvað annað sem Mogganum dettur í hug. Því þó ég fyrirlíti skoðanir Moggans er ég reiðubúinn að verja rétt hans til þess að tjá þær. Það væri samt heiðarlegra af Mogganum að birta þessar skoðanir í eigin nafni í stað þess að skýla sér á bak við aðra við halda þeim fram.“
